Pakihi Māori

He aha te hau e wawara, e wawara

He tiu, he raki,

Nāna i āmai te pūpūtarakihi ki uta, ki uta

E tīkina (atu) e au te kōtiu

(Kukume mai ai).

Koia te pou whakairo ka tū ki te Waitematā

Ka tu ki te Waitemata

I oku wairangi e.¹

Tihei mauri ora!

He hōnore nui ki tō mātou tira ture Māori, ki Te Waka Ture, te whai wāhi ki te tautoko i ngā iwi me ngā hinonga Māori, kia tutuki ai ō rātou whāinga ā-ōhanga, ā-pāpori, ā-ahurea anō hoki.

E whai ana mātou kia pakari ai ngā hononga, kia matomato hoki te tupu o ngā hua o ngā rawa arumoni a te kiritaki, ka para ana i ngā huarahi toitū, e whakaute tonu ai ko inamata, e aronuitia ai hoki ko ngā reanga o nāianei, o anamata anō hoki.

Ko te kawenga nui o Te Waka Ture, ko ngā take ture Māori. E whakarato ana mātou i ngā iwi, i ngā hapū, i ngā kaipupuri whenua Māori, i ngā pakihi Māori, me te hunga e whai ana kia mahi tahi atu ki a rātou ki ngā tūtohunga ture arumoni, ki te mana whakahaere anō hoki. E mārama ana ki a mātou ngā hua me te hiranga o te mahi tahi a ngā iwi, e takapapa ai ngā tairo mā roto tonu i tētahi anga tikanga Māori. Nō reira, ka āta ākina tēnei tūāhuatanga ka āhei ana, ā, ina hiahiatia, ka taea hoki te tautoko i ngā mahi takawaenga i waenganui i ngā iwi.

He pīngore ngā pūkenga o Te Waka Ture, ko ana kaimahi e whakaritea ana hei rōpū āheinga rau, kia wawe ai te whakatutuki i ō te kiritaki whāinga.

E whakapono ana mātou, ko te reo Māori kei te ia tonu o te tūāpapa o te motu. Kua āta whakaūngia e mātou tētahi kaupapa here mō te reo Māori, ā, ka ākina, ka tautokohia hoki ō mātou tāngata kia whakamahia te reo Māori ka taea ana, kia whai ārahitanga hoki mō te reo me te tikanga Māori.

E whakaako ana mātou mō te Mana Whakahaere Rangatōpū ā-Iwi ki Te Whare Wānanga o Tāmaki Makaurau, ko te whare wānanga whakarae o Aotearoa, i ngā taumata tohu paetahi, paerua hoki. I runga tonu i ēnei wheako, e matatau ana mātou ki ngā take o mua, o mohoa hoki, e hāngai ana ki ngā hanganga me te mana whakahaere, otirā, ki ngā ara e hāngai pū ana ki te kiritaki, e taea ai ēnei te whakatau.

He mea nui ki a tātou katoa ngā tikanga Māori, pērā i te kaitiakitanga, i te whanaungatanga, i te manaakitanga, me te tino rangatiratanga, mā reira e mārama ake ai te ara ka takahia e tātou.

He puna tūtohunga mātou mō ngā pakihi Māori, e pā ana ki:

• ngā hanganga mō ngā whakataunga tiriti, tae ana ki ngā ture tiakitanga, ki ngā ture rangatōpū, me ngā ture kaupapa atawhai
• ngā whakawhitinga mō muri i te whakataunga Tiriti
• ngā ture tūwāhi
• ngā ture taimahi
• te waihanga i ngā hinonga tukutahi me ngā tōpūtanga
• te ture whenua Māori / Te Ture Whenua Māori Act 1993
• te whakamārama me te whakamahi i te Māori Fisheries Act 2004
• ngā whakahaerenga a Te Rōpū Whakamana i te Tiriti o Waitangi
• ngā tautohe pīroiroi, tae ana ki ngā kawenga ki te kōti mō ngā arotakenga ā-kaiwhakawā, mō ngā whakatauanga nonoi hoki.

He aha ā mātou kiritaki i kōwhiri mai ai

E ngākaunui ana ā mātou kiritaki ki te mahi tahi ki a mātou, he kaha nō tā mātou whakaute, mārama hoki ki te tikanga, me tō mātou matatau ki ngā take nui. Ko te hua tēnei o ō mātou wheako nui e mahi tahi ana ki ngā iwi, ā, koia e āhei ana tā mātou whakaaro nui ki ngā whakataunga hei painga mō ā mātou kiritaki.

E mōhiotia ana mātou i runga i ō mātou wheako ki te whakaahu i ngā hanganga mō muri i te whakataunga Tiriti. Koinei e āhei ana tā mātou hāngai ki te painga o ngā tukanga hoahoa, tūtohu hoki i ngā hanganga ā-iwi, ā-hapū hoki, ahakoa te momo pakihi, whakawhitinga rānei. He mea hoahoa ā mātou hanganga kia hāpai tika ai i te whanaketanga o te iwi, kia māmā rā hoki mā te mana whakahaere me ngā kaiwhakahaere hei kawe.

1 These words were prophesised by the seer Titai telling of the coming of Pākeha to Tāmaki Makaurau around the time of the signing of the Treaty of Waitangi.